شلون الكويت قبل ؟

تحدثت مع أحد الرجال الذين ساهموا بتأسيس الكويت الحديثة وعند سؤاله 

ياعم شلون كانت الكويت قبل ؟

كانت الإجابة بكل بساطة 

عندما تم بناء الكويت الحديثة في ظل المغفور له بإذن الله تعالى الشيخ عبدالله السالم وتم وضع الدستور كنا قبلها لانعرف سني شيعي بدوي حضري لكن السياسة قسمت الناس إلى فئات وطوائف وقبائل كنا قبل تحت مظلة وحدة وهي مظلة الكويت وكانوا الكويتيين يد وحدة بالسراء والضراء في ذاك الوقت الكل ساهم بالنهضة والرقي بالمجتمع وكان هناك خطة واضحة لبناء الانسان الكويتي لكن اليوم بعد الخير اللي وصلنا له الكل يقط أخطائه على الثاني وصارت كل مجموعة تشوف نفسها إهي الأصلح وقامت تحارب فكر غيرها وتقصيه وهذا عكس ما تربينا عليه وربونا أبائنا واجدادنا قبل ياولدي كلمة تم يعني التزام واليوم عقود وتعهدات وكمبيالات وشيكات والثقة ضاعت قبل كانت النقصة توصلك من الفريج اللي وراك واليوم جارك ما تعرف اسمه قبل الناس تتشارك بالأفراح والأحزان اليوم الناس صارت تتشمت ببعضها قبل الأبو يربي والجار يربي والعم يربي والخال يربي والكل مسؤول عن العيال اليوم كل من يقول اربي عيالي قبل الرجل الكبير له احترامه وما نرادده اليوم صار الوضع يتطاولون عليه وما يحترمونه يا يبا الكويت ماهي مثل قبل وساعات اقول بنفسي النفط صار نقمة مهو بنعمة

محمد مهلهل الياسين 

@Mohammad454