روابي البناي: تكفــون لا تتزهلقون!

صباح الحب، صباح السعاده لكل من يقرأ الجريدة الأحلى والأفضل القبس.. صباح الشراحة والوناسة والاناسة، بداية اسبوع يديدة بكل شي حلو ينطركم بحول اللي ما تنام عينه.

اليوم هذرتي راح تكون خاصة ومخصوصة حق ثلاثة ارباع شعب وطني الغالي اللي شال شلايله وهج الهججان الأكبر من الواهي واللاهوب الكويتي، اللي ولله الحمد والفضل والمنة ما مثله مثيل ولا وصيف على وجه الخليقة، شعب وطني اللي انتشر على خارطة العالم الإسلامي والعلماني علشان يبرد على قلبه ويشرح صدره ويونس عمره ويقط ما وراه ودونه، ويرد عقب يجابل تويتر يتذمر ويقول ليش الأسعار مرتفعة وليش الفساد وغيرها من الليشات اللي ذابلين فيها جبودنا، ابي اقول لكم يا شعب وطني الغالي ترا بهجتكم هذي وايد اشياء طافتكم اصلا بالكويت، طافكم العرض العجيب اللي على الخضره يوم الأثنين بالجمعيات، وطافتكم خلطة الثوم اليديدة مالت دياي نايف اللي اتيي مع البوري اللي يرجخ دهن ودياي الشوايه، وطافكم الفيلم الهندي للي للمرة المليون يعيدونه تلفزيون الكويت، يعنى وايد اشياء طافتكم خل المهايل بالبراد والقعده بالقهاوي بكان ومونترو تنفعكم.
أكيد ان مو هذا مربط الفرس بهذرتي اليوم، مربط الفرس وبلا عقاب وابوه اللي ابي اتكلم عنه، لأن انا وحدة من هذا الشعب الطيب راح اكون ضمن عداد الهاجين قريبا، مربط الفرس اللي ابي اهذر عنه اهو المزامط والشحاطه والاستعراض المليق اللي يسوونه بعض «المشفح» هالحزه من كل سنة، وخصوصا اللي توه راشهم النفط وعندهم بيزتين ومو عارفين شنو يسوون بعمرهم، هذا غير اللي حاطين على اظهورهم قروض وكانوا عاشقين البنك عشق يفوق عشق قيس وليلى العامرية علشان يرفعون Visa Limit، وما بقى احد ما طلوا بويهه علشان يترسون ابواكتهم بجم نوط لزوم سفرة الصيف، الحمد لله والشكر لله ربي يثبتنا ولا يبلينا ان شاء الله.
فكل سنة احنا على موعد، للأسف، مع بعض المناظر اللي اتفشل واتخلي عيون اللي يشوفهم اتصير بقمة راسهم من زود الدهشة من كمية المظاهر والشحاطة والتفلسف الزايد اللي يسوونه البعض، خاصة اللي يصيفون في ماربيا الاسبانية، وسان تروبيه الفرنسية، والماي فير الإنكليزي، والحين بعد دشت عليهم بالخط بودروم التركية، يعني ماخلوا ولا بقوا اسم الله عليهم.

يا أم زيد ورينا اهدوم زيد!
الوكاد ان العالم كله أجمع ان احنا، اسم الله علينا، شعب الله المختار، لأن احنا بكل تواضع شعب الأشياء الحصرية اللي وايد شعوب محرومة منها، فإحنا وبلا فخر الشعب الوحيد اللي يعرف شنو اكو ورا الشمس اللي انودي فيها أي احد مو على هوانا ولا يخلينا انحمق شوي، فعلى طول انقول له «ها تبيني اوديك ورا الشمس؟»، هذا غير سالفة «ما تدري انا منو؟» على اساس ان المفروض والواجب ان الكويتي كل المعمورة يعرفونه من طلته البهيه مادري ليش، وفوق هالألقاب راح اضيف لقب يديد واهو «شعب الله المنهار»، وهاللقب طلعته من شدة الانهيار على الشحاطه والكشخه والزمط اللي وصل له بعض اعيال وطني الغالي اللي محد يقايشهم فيه.
لو الأمر واقف بس على شحاطتنا في ديرتنا نقول يالله السلامه عادي انتحمل، بس الشعب المنهار ما يرضى الا بالانتشار والتألق خارج حدود الوطن، علشان جذي كل سنة انصير حجوة واضحوكة بحلج اللي يسوى واللي ما يسوى، بتقولون لا تبالغين روابي ترا الكل والجميع يسوون النون وما يعلمون، وترا الكويتيين أخف ناس من الشعوب المختلفة اللي اتصيف بره ديرتها واللي اتحب اتبين بزياده شنهو عندها وشنهو ما عندها.
يمكن احنا نكون اخف تأثير على الأجانب لما يشوفون الشحاطه اللي احنا فيها، واللي بنموت منها بس بنفس الوقت ترا احنا وايد over، يعني ليش انا رايحه اتشمس واسوي تان واستانس وبلبط بالماي، مثل ما يقولون ابناء النيل العظيم، ما يبقى اسوار كارتيير ما اشكشك فيه ايدي ولا يبقى تراجي فان كليف ما اقزز فيهم اذوني، ولا يبقى رموش جنها مهفة احطهم على عيني، ولا يبقى هذا غير- عزكم الله- شحاطات الجينا اللي تبرق برق اروح فيها، ليش ترا كلش موكشخه وكلش شي يفشل، لأن اللي كلنا انعرفه ان «ماربيا» و«سان تروبيه» مكان وايد حلو حق السباحه والتشمس والقعده بالكافيهات والتمشي واستنشاق الاوكسجين النقي، يعني مكان وايد بسيط والمفروض اللبس فيه ابسط من البساطة، يعني كلش ملش مو مكان مال تمشون فيه والقصار يصقل وراكم «هب السعد» من كشخة العروس والاستقبالات اللي انتو فيها، والتشكشك بالقلوب والتراجي اللي واصله ليمن سركم، والمضاعد اللي ما تقدرون اتشيلون ايدياتكم من كثرهم، هذا غير الساعات والجناط اللي لا مكانها ولا وقتها بس الواحد شنو يقول ولا شنو يخلي انتو تكشخون كشخة العرس حق «ستار بكس العديلية» تبون ما تكشخون حق ماربيا وسان تروبيه؟!
انزين آمنا بالله الواحد الاحد رحتوا ماربيا وكان ومونترو وترززتوا وتشكشكتوا بالسلاسل والقلوب والخواتم والساعات والجناط، انزين الزمط الزايد اشوله؟ الشحاطه الماصخه اشموديلها؟ يعني اوكي ما تقدرون تستغنون عن الساعه الالماس والتراجي الفان كليف والقلب البانثر الكارتيير والجنطه Hermes، تاخذون من كل نوع اربعه الى خمس اشوله؟ اشماله؟ يعني تبون اتوصلون معلومه ان سوق التقليد بالكويت محد يقايشه؟ ولا تبون اتقولون حق اللي يشوفوكم ترا ما بقا جمعية مادشيت فيها علشان اشتري هالجنطه وارتز فيها؟ ولا تبون تثبتون حق العالم الخارجي ان احنا فعلا شعب كاشخ غلط وفاهم الـluxury، وحتى الشحاطه فاهمها غلط؟، عفية قولوا لي انتو ليش اتسوون جذي، ترا؟ والله عيزت اني اوصل حق تفسير بس ما قدرت.
وطبعا هالكلام مو بس حق الحريم والبنات، حتى الشياب المتصابيين والشباب اللي عايشين الدور واهم مرتزين بقهاوي المارينا في ماربيا بالشورت الابيض والقميص الوردي والاصفر الفاتح وتارسين الشعر جل، ويستعرضون بالسيايير اللي اما امأجرينها او شاحنينها بس علشان ينقال: واي شفتوا سيارة فلان وعلان!.

انزين وتاليتها؟
لبستوا وحطيتوا وتشكشكتوا وعقب شنو استفدتوا؟ انبقتوا هذا اذا كان صج انبقتوا؟ مو فيلم تبون اتسوون فيه show علشان الناس تتكلم مسكينة فلانة انباقت جنطتها اللي شاريتها بتسعة الاف، ولا خنت حيلي علانه ساعتها الـgraff ام الماس اخضر انباقت.. وغيرها من الافلام والسيناريوهات الفكاهية اللي نسمعها بسفراتكم كل سنة، وحتى لو كان صج انكم انبقتوا ترا زين يسوون فيكم وعفية عليهم، لأني ما ألوم الحرامية اللي باقوكم، لأنهم بكل صراحة وعفوية لبوا نداء الطبيعة اللي انتو شايلينه وتفترون فيه جدامهم، فبالله عليكم ربي سبحانه وتعالى ما شفناه بس عرفناه بالعقل، تبون هالحرامي اللي ما شاف الخبزه صار له اسبوع يشوف وحدة تمشي جدامه من ساسها ليمن كرياسها متروسه افلوس ما تبونه يبوقها ويروح يصقلها ويعيش سنتين جدام سلطان زمانه، هذا في حالة اذا كان اللي لابسته اصلي مو شغل المباركية يا ولد الحجية، ولا تبون هالمتعاطي اللي يتشفق على البيزه امشافق علشان يروح يعدل اصماخه بحشيشة ولا قزة ابرة يلقى هاللي اتلوفح بشعرها ورازه جنطتها علشان غصبن عليكم اتشوفونها ما تبونه ينقض عليها ويبوقها؟

آخر الكلام: 
صديقاتي وربعي العزيزات الحبيبات اقولها لكم عبر القبس، اللي اشوفها بالسفر زايدة الجيلة ويايبه اليهده بالشحاطه وما خلت ولا بقت شي بالكبت ما لبسته، اسمحوا لي ترا برفع شعار «عافك الخاطر» ليمن نرد الكويت لأن ماراح اتحمل هالشي ولا راح اقدر اسكت، علشان جذي اللي تبي تكشخ حبتين خل تكشخ قبل لا اييكم وقبل لا اتكحلون عينكم بشوفتي.