روابي البناي: الأربعاء الأسود!

اليوم صباحي راح يكون خاص حق حبيبتي ونور عيني الكويت؛ الكويت اللي مالي ويه اصبح عليها ولا اوايها من فعايل بعض اعيالها اللي للأسف يحملون جنسيتها ومحسوبين عليها.. مواطنين المفروض انهم خفيرين بتعداد سكانها، الكويت اللي ما تدري منو طقاقها، الكويت اللى ثلاثة ارباع شعبها ياكلون ويمشون ايدهم بالطوفه وفوق هذا كله موعاجبهم، الكويت اللي كل مالها تتهرقل وتتحندب عدد من المرتزقة من اعيالها اللي رافعين شعار من صادها عشا اعياله، الكويت اللي بفعل فعايل اعيالها اللي كبرتهم وخلتهم رياييل صارت اخبار التزوير والفساد والبوق فيها خبر اول بقنوات الخليج، الكويت اللي خيرها علينا من اصغيرنا ليمن كبيرنا. صباحي انتي يا كويت صباحى لج يا وطن عمري صباحي كسره وغصة بقلبي وقلب اعيالج اللي ما يرضون عليج بأدناة الدون بس الواحد شيقول «ان حجيت حجيت عيبي وان سكت شقيت ييبي».
صباح الخير يا وطن النهار اللي مهما يسوون ومهما يحاولون يهدونك راح تظل شامخ وعالي وتتسامى على الجراح.

سود الله ويوهكم 
الأربعاء 18 يوليو 2018 تاريخ عمرنا ما راح ننساه وراح يصير محفور بمخوخنا مثل تاريخ دخول عراقي اقريح المقبور صدام حسين وجيشه البربري علينا يوم الخميس 2 اغسطس 1990، هذا التاريخ اللي مستحيل انه ينساه او ما يذكره اهل الكويت اللي عانوا وتشردوا وترملوا وتعذبوا بدون ذنب من يار المفروض ان خيرهم عليه.
ونفس الشي للأسف عقب 28 سنة اهل الكويت يقومون من النوم على فاجعة بس هالمرة للأسف ان هالفاجعة من الداخل مو الخارج من القريب مو من الغريب من الصديج مو من العدو، بهاليوم الشعب الكويتي كله عن بكرة ابيه حاشته صدمة كهربائية كهرومغناطيسة انا وحده للحين ماني قادرة اقوم منها، بهاليوم الشعب الكويتي فتح عينه على خبر يقول ان تم اكتشاف عدد ما يستهان فيه من شهادات قيادين ومتنفذين بالدولة صار لهم اسنين وابنين ياكلون ويرتعون من خير هالديرة امزوره، عدد كبير ما بين دكاترة ووزراء ونواب يشرعون والمفروض انهم يحاسبون الحرامي والمختلس والمزور لأن الشعب استأمنهم على ماله وحلاله ومستقبل عياله، وناس بالسلك القضائي والتعليمي والتربوي والصحي والإعلامي وغيرها.
سود الله ويوهكم اكثر من السواد اللي فيها، سود الله ويوهكم وعساكم ما تربحون لا دنيا ولا اخرة دامكم فشلتونا جدام العالم، سود الله ويوهكم على هالفعايل والعمايل اللي حتى الجهلة ما يسوونها بس للأسف انتوا سويتوها علشان الفلوس والمناصب اللي عساها نار وشرار في بطونكم. انا بس ابي اعرف ليش؟ الكويت اشسوت لكم؟ الكويت بشنو قصرت معاكم؟ ليش هالدونية؟ ليش ما عندكم غاريه على ديرتكم وعلى سمعته؟ ليش ما عندكم ولاء حق هالأرض اللي من يابتكم امهاتكم وانتوا ترتعون من خيرها ليمن المفروض انكم صرتوا رياييل ينشد فيهم الظهر؟ ليش سودتوا ويوهنا عسا ربي يسود ويوهكم ليش؟
هل هذا جزا المعروف؟ هل هذا رد الجميل؟ هل هذا اللي تربيتوا عليه؟ ولا سياسة النوط والكرسي كلت مخكم هذا ان كان عندكم مخ حالكم حال خلق الله.

بص شوف الكويتي بيعمل ايه؟! 
طبعا فيلم النصب والاحتيال ما يكمل إلا بمساعدة تقنية فنية تكتيكية من الخارج، وفعلا طلع الطباخ اللي يتوبك الخلطة ويوزن البهارات حق الطبخة قبل لا تدش الفرن العود في قاهرة المعز احد الوافدين اللي يشتغلون بوزارة التعليم العالي واللي صار عمي جدام الآلاف اللي تتحاذف عليه، فالأخ حسباله انه قاعد في بولاق الدكرور ولا امبابة وما الومه لأن لا حسيب ولا رقيب، والأدهى والأمر ان حاميها حراميها، يعني اعيال الديرة اهم اللي ايون له ويقولون له «بص حضرتك والنبي عاوز ابئي دكتور»، وطبعا الدكتوراه عند ولد امبابة اسهل من شربة الماي، بس كل اللي عليك حط انواطك باليمين واخذ شهادة الدكتوراه باليسار وعيش حياتك وقص على ديرتك وعيال ديرتك وانشر فسادك على راحتك، لأن ماكو من يراقبك ولا اكو من يحاسبك.
بس للأمانة انا ما اشره على ولد امبابة ولا على رفيجه اللي يشرف على طبخة الدكتوراه والماجيستر وغيرهما من الدرجات العلمية، لأنهم ناس عمرهم ماشافوا خير وعمرهم ماشافوا نوط بو اميه بعينهم، فما بالك بنوط بو الف؟ انا اشره عليكم انتوا يالكويتيين ياللي شايفين خير ياللي المفروض عينكم متروسة وشبعانين، انتوا اشلون رضيتوا ترخصون بنفسكم وتخلون مصيركم بإيد واحد يمكن بأي لحظة يفضحكم علشان غيركم ترس جيبه بنوط اكبر من نوطكم؟ انتوا اشلون رضيتوا ترخصون باسم الكويت وتخلون ولد امبابة يتفضل عليكم ويضحك على صوركم اللي شاطرين تترسون فيها الجرايد والتلفونات لما تستلمون الشهادة، ويقول «شهادة الغبي ده مضروبة انا اللي ضربها بثلاث آلاف دينار». انتوا اشلون رضيتوا على روحكم تاكلون وتوكلون اعيالكم حرام طول هالسنين؟ قولوا لي اشلون؟ بس مقيوله اذا ما تستحي افعل على ما تشتهي!

سمو الرئيس قعدتوا ولا للحين؟ 
سمو رئيس مجلس الوزراء بس ابي اتأكد سموك والحكومة الرشيدة انتبهتوا ولا للحين؟ انا اللي اعرفه اللي منتبه منكم بس الأخ العزيز «بوناصر» أنس الصالح لأن اهو الوحيد اللي طلع وصرح ان قضية التزوير والمزورين راح تتم احالتهم الى مكافحة الفساد، وان الحكومة لن تسكت عن هذه الفضيحة، طبعا يشكر بو ناصر على هذا التصريح بس يا بوناصر مدامك انت الوحيد اللي تكلمت وبردت اجبودنا من صوب الحكومة بقولك اياها ترا هالتصريح ما يبرد واهي، هالتصريح مو كافي، احنا نبي فعل، احنا نبي تكشفون جدامنا اسامي الكل والجميع علشان انصدق انكم تتبعون معانا مبدأ الشفافية، احنا نبي الكل يحاسب والكل يعاقب علشان انصدق ان ماكو احد فوق القانون، احنا نبيكم اتقولون لنا منهو النواب اللي بدوا يتحركون ويتدخلون علشان يطمطمون هالقضية اللي تهز كيان وسمعة وطن، هذا اللي نبيه يابوناصر وانا على ثقة ويقين انك قدها وراح اتسويها، وعلى طريجك يابوناصر جان زين تنبه سمو الرئيس وباجي اعضاء رشيدتنا وتقول لهم ترا الشعب ولهان على طلتكم البهية وعلى سماع صوتكم وتصريحاتكم، قول لهم ترا هذا شي من لاشي يمكن يهل على الكويت واهلها اذا طال صمتهم وطولت نومتهم، قول لهم ان الأمم التي سكتت عن الفساد ونخر فيها الفساد انهارت واحنا ما نرضى على الكويت انها تنهار وان شاء الله حتى انتوا يابوناصر ما ترضون مثلنا ان الكويت تنهار، قول لهم اهل الكويت ناطرينكم اتشمرون عن ذرعانكم وتبدون اتصلحون ما يمكن اصلاحه من سوء استخدام للسلطة اللي يتبعها البعض لتحقيق المكاسب الشخصية وممارسة النفوذ ومحاباة الأقارب والفساد السياسي اللي كل ماله ينخر بالكويت مثل الدمل.
العزيز «بوناصر» ما عليه زد الجيلة عليك اليوم لأنك مثل ما قلت انت الوحيد من الحكومة اللي طلع وصرح وتكلم معانا بهالموضوع وبالتالي ما عندنا غيرك انرد الراس فيه، بو ناصر للأسف واقولها لك بكل صراحة وانا محاسبه على كل كلمة اقولها احنا بدينا نوصل لقناعة ان حكومتنا الرشيدة غيرت شعارها من معا للإصلاح الى معا للتغاضي عن الفساد «ما لنا خلق»، واعذرني يابوناصر فاللى يشوف السكوت العظيم لرشيدتنا وتهاونها بكثير من الأمور راح يقول هالكلام وازيد، فأتمنى مثل ما يتمنى كل اهل الكويت المخلصين الأصليين مو المزورين ان نشوف سمو رئيس رشيدتنا بمؤتمر صحافي يكشف فيه النون وما يعلمون في ما يخص هالطامة وغيرها من قضايا الفساد اللي بدت تنتشر مثل الوباء بوطني الغالي، اتهقى يابوناصر راح تتحقق امنيتي ولا اقبض من دبش؟

آخر الكلام:

سمو رئيس مجلس وزراء رشيدتنا الميمونة، بس احب استذكر لسموكم بعض مقتطفات قالها رحمة الله عليه الدكتور احمد الربعي في احد لقاءاته وكأنه كان يقرأ المستقبل «قال ان ما تمر به الكويت انذاك يعني بوجوده هو اخطر من غزو صدام حسين، تدري ليش لأن صدام وربعه ندري انهم اعداء ومجرمين بس ما نمر به اليوم هو من داخلنا هو منا وفينا هو مثل ما يقول آه من بطني وآه من اظهري». اتمنى يا سمو الرئيس ان الرساله تكون واضحة امامكم لأننا نتكلم ونكتب ونقول من زود المحبة والخوف على وطن النهار، واللي ان شاء الله انكم اتخافون عليه واتحبونه اكثر منا.