روابي البناي: بـركات فال أم سليمان!

روابي البناي –
اول شيء يصبحكم ربي ويربحكم بكل خير وحب وسعادة، صباح آخر أحد بها لسنة ويابختي وانا اصبح عليكم فيه، لأنكم وايد شي مهم عندي. يوم وليلة تفصلنا عن استقبال السنة اليديدة واللي عساها تكون بداية خير وسعادة عليكم وعلى كل من يعز عليكم، تتحقق فيها كل امانيكم واحلامكم بحيل اللي ما تنام عينه.

مثلما عودتكم، وعساها عادة ما تنقطع، اخر هذرة بالسنة تكون عند العزيزة الغالية «ام سليمان» بخيمتها اللي كل سنة تكبر وتزيد من الدناديش والخراخيش اللي اتعلقهم ام سليمان، هذا غير انواع المشروبات الشتوية الدافية اللي اتخلي الواحد يتحير شنو يشرب وشنو يخلي، بس انا والعياذ بالله من كلمة انا، دايما رافعة شعار «ما الحب الا للحبيب الأولي»، علشان جذي من اقبل على ام سليمان، ألاقي أمي حسينة الله يطول بعمرها، واللي ما يحلى المقعد ولا السوالف ولا الطرب على «لحاج الله يا نفسي على الجايد تحديني» إلا معاها، تكون امزهبه بيالة الحليبه اللي ريحتها اتبط الراس بط من خنتها والقرص العقيلي المتروس عن بكرة ابيه زعفران ومسدوح على كتر ينطرني، وعقب ارتز بالوسط علشان لا يطوفني شي، وتبدي رحلتي مع الغالية ام سليمان اللي ابهرتني هالسنة ببشتها الزري اللي يرهش رهاش.

منهي أم سليمان؟
وايد اسألوني منهي ام سليمان؟ هل اهي فلانه مرت فلان؟ ولا فلانه اللي فلان ما يشك خيط بإبرة إلا بشورها ورايها؟ ولا اهي اللي قروب الوناسة منهارين انهم يروحون خيمتها؟ هذا غير اللي اطلبوا انهم يكونوا معاي يوم الجمعة بخيمة «ام سليمان» العامرة علشان يوسعون صدرهم ويشوفون الأكو والماكو ويعرفون شنهو 2019 خاشه لهم من مفاجآت.
أم سليمان، حق اللي ما يعرفها، اهي وحده من حريم وطن النهار، اللي انا شخصيا اعتز وايد بمعرفتها لأنها وايد سنعة ووايد راقية ووايد اجتماعية ووايد شخصية ايجابية، واتييب السعادة حق اللي معاها، ام سليمان ما شاء الله عليها اتعرف القاصي والداني من الجنسين، والكل والجميع يبي يخدمها بأي شكل من الأشكال، ام سليمان يا محفوظين السلامة من ربع «يا حسين انا عيني سهيره ما تذوق المنام» و«لسه فاكر قلبي يديلك امان»، يعني صاحبة ذوق جدا رفيع، الله يسلمكم وايد مقعدها اينن ووايد ونيس ووايد مفيد، بس بنفس الوقت أم سليمان ما تغشمر تقول حق العوي انت عوي بويهه لو منهو يكون ولو كان اقرب قريب لها، وتقول حق السنع والزين انت خوش وعفيه عليك لو كان ما يواطنها ولا يداني شوفة رقعة ويهها.
انزين يمكن تقولون واحنا شنهو اللي يفيدنا من هذرتج ومدحج عن ام سليمان؟ انا اقول لكم ام سليمان يا لغاليين عندها الحاسة العاشرة، ما شاء الله عليها، ومتعوده مع ربعها المقربين انها تقعد وتتسلى معاهم وتقول لهم من باب الدعابة، على قولتهم، شنهو لهم وشنهو اللي عليهم، عاد انا كلش ملش ما فيني بلاغة شف ولا فيني شفاحة اني اعرف شنهو اللي لنا كمواطنين صالحين وشنهو اللي علينا، فكل راس سنة تلقوني اول وحده باصمة حضور بخيمة ام سليمان الونيسة الأنيسة علشان انشوف فالها العجيب شنهو خاش لنا.
وللتوضيح، علشان لا تقوم القيامة في الطير المدلقم وبلاعين البيزه، بقول شي واحد، لا انا ولا القبس وكل اللي فيها احد يقدر يزايد على علاقتنا بربنا، اللي اهي شي خاص جدا جدا بينه وبينه سبحانه، وللتوضيح زيارتنا السنوية لأم سليمان ما تتعدى الغشمره مع هذي الشخصية العجيبة، لأن احنا ندرك ان الغيب بيد الله سبحانه وتعالى وحده، بس تبقى زيارتنا السنوية لصاحبة «الفال» اللي يخرع واللي خله وايد ناس ما ينامون الليل من باب الدعابة ومن باب التسلية ومن باب اننا نطبق اغنية صاحب الصوت الجميل مطرف المطرف «ولا راح الأمل»، لأن مثل ما انتو عارفين احنا بالكويت نبي أي بريق امل واي كلمة حنينة واي حرف يعطينا تفاؤل انتعلق فيه.

عشتوا روابي! 
عقب ما شربنا الحليبة الناطعة ولحفناها بقرص العقيلي الخنين تربعنا وجابلنا ام سليمان، وجان اقول لها هاتي ما عندك يا أم بشت يرهش، جان تقول انا هالسنة ببدي فيج ياروابي وبشوف اشعندج وشنهو خاشة عني، لأنج خامرة صار لج جم شهر ما كلمتيني ولا قلتيلي اخر اخبارج، مغير اسمع بس شوفوا روابي اشكاتبه وشوفوا روابي شمسويه، وانتي خاموش ما كو لا حس ولا خبر، ضحكت وقلت لها شوفي وقولي اللي تبينه كلي اذان امشتحه وصاغية.
افتحت ام سليمان صرتها اللي فيها الفال وبققت عينها وبولعت بريجها وخوزرتني جم خزره جان تقول: عشتوا روابي واشنهو هذا ماشاء الله 2019 راح تكون سنة القمة حقج، جان اتعدل بقعدتي واكشح كشتي لي ورا واقول لها قولي اطربيني طال عمرج اشلون؟ جان تقول شوفي بتييج بيزات وايد بس عاد ان شاء الله ما تطيرينهم بيومين، لأني اعرفج ما اتخلين ولا اتبقين اذا صار عندج جم فلس، وراح يكون لج لقا مع شخصية وايد جبيره، والجبير الله، بس ها حطيني على بالج مو تموقين علينا مثل اللي توه راشهم النفط، قلت لها: افا عليج يا ام سليمان كلش مو موديلي وان نسينا الحمد شنصلي فيه؟
كملي الله يخليج شنهو بعد عندي، عاد في اشياء قالتها ما يسمح مقص الرقيب اني احطها، بس تشرح القلب وتسر الخاطر الحمد لله، وفي اشياء اتخرع لأنها قالت لي حطي بالج من بعض الحيايه الرقطه اللي حولج واللي يظهرون عكس ما يبطنون، واللي اتوقع انج عرفتيهم عدل، قلت لها لا توصين حريص يا ام سليمان عرفتهم وخبزتهم ومعطيتهم على هواهم، لأني احب اضحك واحب اشوف التمثيليات خاصة الدراكوميدية.

سنة المفاجأة والمسرات! 
المهم الحين خليج مني يا أم سليمان، انا ابيج تقولين لي عن الكويت واهلها شنهو خاشه لهم 2019؟
شوفي يا محفوظة السلامة 2019 ان شاء الله راح تكون غير بكل المقاييس، لأنها راح تشهد تغييرات بكل الأصعدة ماشاء الله، يعني السياسة والاقتصاد والثقافة والمجتمع والإعلام.. كله عن بكرة ابيه راح يحوشهم تغيير جذري ايجابي يونس ويخليكم كلكم اتغنون «طاير من الفرحه طاير».
فقلت لها أم سليمان انا ما ابي تبيعين لي سمج بالماي ابي تقولين لي شي يبرد قلبي عسا الله يبرد قلبج، قولي لي هالخرزه الزرقه المقلوبه شنو؟ وهالي منجفيه على ظهرها وماخذه كتر شنهي؟
ردت ام سليمان وقالت يا كثر هذرتج يا روابي ويا كثر ما تسألين من وين تبينه نبدي؟ قلت لها طمنيني على وطني حبيبي وطني الغالي.
الكويت يا روابي ان شاء الله في 2019 راح تكون أحسن بوايد من 2018 لأن لله الحمد والفضل والمنة راح يتم زواج كاثوليكي امغبط حب وتفاهم وسلاسة بين السلطتين التشريعية والتنفيذية، وراح تفتكون من الدندرة الزايدة اللي ما تودي ولا اتييب، هذا غير انكم كلش ملش ماراح تسمعون جملة «عندك شهر اذا ما عدلت وزارتك المنصة تنطرك»، يعني الوضع راح يكون عال العال ان شاء الله،
وعقب ما يتم الزواج بين المجلسين راح تبدون اتشوفون ثمرة هالزواج اللي اوله راح يكون مع قطار التنمية اللي راح يزقد امزاقد، والمشاريع اللي راح اتخلي عينكم بقمة راسكم، والمناقصات اللي راح اتهل على القاصي والداني من شعب وطن النهار عقب ما كانت محكوره على اسامي معينة لأنها تتبع سياسة خشمك اذنك، فمن كثر ما وضع الكويت راح يكون ممتاز اخاف اكمل روابي علشان لا احسدنا.
انزين واحنا يا أم سليمان شلون؟ قصدي شعب وطن النهار المنهار ان شاء الله اموره طيبة؟ طمنيني واللي يعافيج.
اشفطت ام سليمان شفطة عميقة من فنيال القهوة التركية اللي محد يضبطها غير «فريال» ام شعر اشقر واللي اهي ايد ام سليمان اليمين بكل شي جان تقول:
ما شاء الله شالشي العدل، اهي بشارة يا روابي حق المجتمع بس موحقج؟ قلت لها افا ليش؟ جان تقول لأن ماراح يكون عندج شي تكتبين عنه ولا تنتقدينه لأن «بنات عشتوا» راح يعتزلون عزايم ما عندنا شي بس نبي انسوي شي، يعني مثل ما انتي عارفه قبل اذا وحده كحت سوت عزيمة علشان يقولون لها حلو اسم الله عليج، واذا وحدة اشرقت سوت عزيمة علشان تشرب الماي ويقولون لها هني، فهالعزايم حمد لله ربي في 2019 راح يفكنا منها ومن ملاقتها.
هذا غير «الملكات» اللي عايشين الدور انهم صج واهم خنت حيلي محد درى عن هوى دارهم، راح يهيعون وييوزون ويركدون ويعرفون ان هالطيارة والشفاحة اللي اهم فيها ما منها فايدة، وان الثوب اللي اطول منك يعتك، فراح نفتك من السنابات الباسجة اللي يشايخون فيها حق بعضهم البعض، وكل وحده تقص على الثانية وتقول لها so creative لأنها دشت عليهم واهي لا خلت ولا بقت شي ما البسته وتشكشكت فيه، وشالجمال والحلاة وغيرها من الجمل اللي اتييب الحارج والتمثيل اللي حتى «السبكي» بأفلامه التجارية ما يسويه.
وعاد البشارة العودة يا روابي ابيها منج، خبرج بعض اللي متقمصين دور ان احنا وايد شي مهم بالمجتمع، وان اسمنا بأعلى قائمة البنتاغون الأميركي والشعب منهار علينا وعلى اخبارنا، النماين اللي حاطين لهم Bodyguard يمشي جدامهم ووراهم لمن يدشون مجمع ويفتح لهم الباب لمن يروحون العزايم اللي يقلقصون عمرهم فيها، حمد لله ربج استجاب لدعاء الخيرين من اهل الكويت وشافاهم من اللي اهم فيه، وراح يعرفون ان الله حق وان اللي قاعد يسوونه هذا وايد جرم وغلط بحق الكويت وحق نفسهم، لا وازيدج من الشعر بيت راح يخافون الله ويدفعون ايجارات المحلات اللي امأجرينها ويتشيحطون فيها جدام الله وخلقه واهم ما يدفعون لها.
وابشرج بعد يا روابي امطفق ومهرجين السناب والانستغرام والطير المدلقم السانهم راح يلصق بلهاتهم، يعني ماراح انشوف تنهوص ولا جذب ويور ودعايات غسيل انواط لأنهم انكشفوا والشعب صحى من نومة اهل الكهف اللي كان نايمها وصرخ وقال: شنو هذا اللي انا اسويه بنفسي لمن اشوف هالنماين.
وقبل لا اتكمل ام سليمان الصراحة قلت لها: واللي يسلمج خلاص خليني طايرة من الأناسة على هالفال العدل المدل اللي قلتيه واللي ان شاء الله نشوف ربعه في 2019 قولوا امين.

آخر الكلام
أحب أن أتوجه بالاعتذار لكل شخص أسأت له بقصد أو من دون قصد سواء بالكلام أو بالإشارة أو بأي طريقة كانت، وتسببت بجرحه أو مضايقته، وألتمس منه العذر لأنني أحب أن أبدأ سنتي الجديدة وقلبي أبيض على الجميع، وأتمنى أن يبادلني الجميع هذا البياض، أما أنتم أعزائي القراء فكل عام وأنتم بألف خير، ويا رب تكون 2019 سنة خير وسعادة عليكم وعلى الكويت، وأن يحفظكم الرحمن من كل شر ويحقق أمانيكم، وأشكركم على تحملكم لي وألتمس منكم العذر على كل زلة أو هفوة تفوهت بها وتسببت بجرح مشاعركم أو إيذائكم، فعذرا لكم أحبائي وكل عام وأنتم بألف خير.