> فن وثقافة

سناب المرحوم!

2019-09-21 09:39 PM

صبحكم الله بالخير يا شعب حكومته مستاءة من معدلات الفساد، صبحكم الله بالخير يا شعب مجلس أمته يوم ياب اليهده يابها بقانون البيجاما أم الف دينار، صباحكم زين وونيس وشرح وبداية اسبوع امزكرته ما فيها ان شاء الله ريحة الفساد ولا المفسدين. اليوم الله يسلمكم بهذر معاكم عن اخر ما توصلته التقاليع والفناتق الكويتية، اللي كل مالها اتييبنا ارض ارض بدل ما ترفعنا جو جو، اليوم بهذر عن سنابات «المراحيم» رحمة الله عليهم، اللي صايره هبه عندنا بالكويت، فإحنا يالله من فضلك من كثر ما نحب المواجيب ومن كثر ما السنع والمنع واصل حده عندنا، حتى اللي يموتون وربي ياخذ امانتهم ما انعتقهم ولا انخليهم يتوسدون يمناهم بسلام وأمان، بتقولون شلون؟ انا اقول لكم.. من قلب الحدث! طبعا احنا شعب لا خلينا ولا بقينا مغز ابره ما خلينا شحاطتنا تدش فيه ويبنا اليهده فيه، حتى بالعزا الانهيار يوصل اعلى مراتبه عندنا، لأن للأسف وصلنا لمرحلة التفكير اشلون يصير عزانا احسن من عزا بيت فلان؟ واشلون شكلنا واحنا بالعزا يصير احلى من شكل مرت فلان وبناته واللي على حبلهم، واي حزه اروح اعزي علشان اكون محور الكون والأنظار، فصارت روحة العزا عند بعض الأوادم كأنها روحة يمعة ربع ولا استقبال من كثر التفلسف والـshow، هذا غير نشرة الأخبار اللي تبث من بعض النماين اللي كلش ما يموتون على تنقل الحجي ولا الهذره الزايده والتظهول والإشاعات، ففعلا الوضع هالأيام بالعزا صار كلش مو خوش شي، ولا فيه مراعاة لحرمة الميت ومشاعر اهله. يمكن الحين بعضكم بيعدل قعدته ويضبط نسفته ويقول روابي اشعلامج الله يهداج شنهو اليديد بالسالفه؟ هالشي صار عرف وانتي بنفسج كتبتي عنه قبل هالمرة. ادري ان هالشي، للأسف، صار عرف وصار منظر يومي واحنا نروح انعزي بوفاة عزيز عند البيت الفلاني، وغالي عند البيت الفلنتاني، وادري انا نشوفه وانا كتبت عنه من قبل، بس اللي ما تدرون عنه ان السالفه وايد تطورت وتعدت مرحلة الحش والقراض بالعزا والشحاطة وغيرها، السالفة يا الطيبين ان بعض النماين من ابناء وطني الغالي اللي ما يبيعون برد مثل ما يقولون، بس للأسف ان بيعة البرد مالتهم مو بالشي السنع والصح، لا بيعة البرد مالتهم بالشي العوي واللي لا هو من سلقنا ولا نهجنا، ودخيل علينا ككويتيين مع وضع ثلاثين تريليون خط احمر تحت كلمة كويتيين، فهذي الفئة من ابناء بلدي من المنهارين على التصوير من موديل انا اصور اذن انا عايش، على اساس انهم وايد كائنات مهمة بالمجتمع ووجودهم سر الحياة على قولة الفاضلة «أصيل بنت حجي هميم»، فهذي الفصيلة من ربع صورة من قلب الحدث وما يهم وين وشنو اهو الحدث اللي يصورونه وينقلونه، المهم عندهم بس انهم يصورون ويكونون السباقين في نشر هالصورعلشان ينقال انهم المصدر في النشر. المهم ما لكم بالطويلة، قبل جم يوم وصلني مقطع فيديو، بس مو أي مقطع، الصراحة شي يعجز اللسان عن وصفه على قولتهم، وتعجز الكلمات انها توفيه حقه، وتعجز العين من التبحلق فيه، وطبعا كل هالأشياء اللي انا شخصيا عجزت عنها مو لأن هالمقطع جميل، ولا لأن التصوير مو طبيعي لا حشا، لأن المقطع كان عباره عن بث حي ومباشر لدفان ميت، ايه والله العظيم لدفان انسان ميت. ادري كلكم الحين في وضع الانبهار وعينكم يمكن صارت بقمة راسكم، لأنكم ناس طبيعية وما تتخيلون ان اكو بشر طبيعيين ينقلون بث حي ومباشر لعملية دفان ميت، لأن هالشي ينافي الطبيعة البشرية، بس هذا اللي صار وهذا اللي قاعد يصير بوطني الغالي. تفاصيل التفاصيل! وعلشان ابهركم زيادة، واطق بوهتكم بضمير النقل كان تحديدا من مقبرة الصليبيخات، عن طريق برنامج السناب شات وباستخدام فلتر «من قلب الحدث»، واللي يصور للأسف بكل فخر واعتزاز واحد من اهل الميت رحمة الله عليه، نقل لنا بكل اريحية وبراد قلب عملية غسل الميت رحمة الله عليه وتجفينه، وعقب شيلة اهله له ليمن لحظة توسده يمناه داخل قبره. للأمانة انا وحده من الناس مخي ومخيخي ونافوخي كلش ملش ما خطر على بالهم ان السخافه والتفاهه توصل عند بعض ابناء وطني الغالي ليمن الأموات وليمن المقابر وليمن الدفان، يعني الصراحة ابدعتوا ابداع بدرجة امتياز مع مرتبة الشرف بقلة العقل وقلة الوعي والكشخة الغلط. حتى المقابر؟ عقب ما شفت مقطع الفيديو، قلت وايد سالفة دشة العزا وشعور اني داشة القاعة الماسية، وعقبي بدش بوسليمان يصقل بطاره وراي وبيعطيني ما عطاني زماني من سامرياته السنعه، ويقول تيه افكاري غزال ياعلي شفته شمال، ولا غاب بدري انا يا من يجيبه اهون واخف وقعا، على قولة ربع ابو الأسود الدؤلي، من منظر تصوير المقبره والميت واهو يندفن، يعني انا مادري شسوي بعمري ولا ادري شقول، انتو من صجكم؟ وين تبون اتودونا؟ وين تبون توصلون؟ حتى الموت ما سلم منكم؟ ولا من تفاهتكم وسخافتكم؟ العزا حولتوه من عظم الله اجركم الى يمعة الله يرحمه وقلنا يالله ما عليه كيفهم، بس توصل السالفه الى المقابر؟ لا الصراحه انتو مو طبيعيين ولزوم انشوف لكم طب ودوا حق البلا اللي انتو فيه لأن هذا شي مو طبيعي، شنو اكثر من الموت ما يهزكم ولا يأثر فيكم؟ شنهو اكثر من صورة قبر متر في متر ينحط فيه عزيز عليكم ماكل وشارب وضاحك معاكم والحين اتشوفونه جدامكم ملفوف بخرجه لا حول له ولا قوة، وانتو واقفين اتصورون وتنشرون لا استحيتوا ولا انتخيتوا؟ شنو اكثر من انكم اتشوفون نهايتكم جدامكم ولا تنهز فيكم اشعره لا وتحطون فلاتر بعد؟ الصراحه الحالة الكسيفة اللي وصلنا لها بسبة هالنماين وايد شي يخرع ويضيق الخلق ويفشل بنفس الوقت. عفية ركدوا! يا جماعة الخير ترا الوضع وايد يخرع، لأن وجود هالمقطع ماله إلا معنى واحد ان احنا وصلنا لمرحلة ميئوس منها من الاستخفاف واللامبالاة وعدم الاحترام لحرمة الميت، ولا الخوف من الله ولا رسوله، ولا حطينا ادنى اعتبار لأهل هالميت اللي منعصر قلبهم على ولدهم، شنهي بتكون حالتهم لمن يوصل لهم هالمقطع ويشوفون هالمنظر اللي الواحد ما يتمناه حق عدوه، فما بالك بحبيب ولا عزيز عليه؟. ما عندي شي اقوله غير الله يهداكم ويصلحكم ويطخخكم ويوخر وشة العقل اللي اتييكم من وقت لي وقت، ويفكنا من سناب ولد حجي شات وربعه، اللي كل مالهم يردونه قري ويدخلونه بسوالف لا لها راس من كرياس، وان شاء الله ربي ما يعاجبنا ولا يحاسبنا بفعايل البعض منكم، لأن احنا بروحنا على طريف نبي الستر والرضا هالدور تصوير اموات ومقابر وقبور؟ روابي البناي

عدد الزيارات : 903 زيارة

قد ترغب


انخفاض حاد في وزن انجلينا جولي يدخلها المستشفى	فرنسا تقلد الأديب الكويتي طالب الرفاعي وسام الآداب والفن	إف بي آي» يدين أليك بالدوين في قضية مقتل المصورة

كل التعليقات

لا توجد تعليقات علي هذا الموضوع

آخر الأخبار

إقرأ أيضا

رأيك يهمنا

أقسام الموقع